Новости за 20.02.2024

ТР Дәүләт Советы Рәисе, «Бердәм Россия»нең төбәк бүлеге секретаре Фәрит Мөхәммәтшин бердәм россиялеләрне Татарстан районнарында гаиләләрнең проблемаларына игътибар юнәлтергә чакырды. Партиянең Татарстан бүлеге сәяси советы президиумы утырышында ул шулай дип белдерде. Бу турыда «Татар-информ» хәбәрчесе Надежда Гордеева яза.

28 февральдә 18.30 сәгатьтә Тинчурин театрында Кәрим Тинчурин исемендәге Татар дәүләт драма һәм комедия театры оркестрының 35 еллыгы уңаеннан юбилей концерты була. Бу турыда Татарстан Мәдәният министрлыгы хәбәр итте.

Россиядә җитештерелә торган полимерларның – 30 процентка якыны, каучукның 42 проценты Татарстанның ике предприятиесе өлешенә туры килә. ТР Рәисе Рөстәм Миңнеханов Мәскәүдә «Энергетика» Илкүләм казанышлар форумының «Россия энергетикасының лидерлыгы һәм тотрыклылыгы» пленар сессиясендә шулай дип белдерде., дип яза «Татар-информ».

Татарстан Рәисе Рөстәм Миңнеханов республикада «Мәгариф» илкүләм проектын гамәлгә ашыру турында видео күрсәтте.

«Аммоний-2» заводын төзү Татарстанда азот ашламалары җитештерүне 2,5 тапкыр арттырырга ярдәм итәчәк. ТР Рәисе Рөстәм Миңнеханов Мәскәүдә «Энергетика» Илкүләм казанышлар форумының «Россия энергетикасының лидерлыгы һәм тотрыклылыгы» пленар сессиясендә шулай дип белдерде.

Татарстан Россиянең нефть чыгара торган төбәге санала, бүгенге көндә нефть табу күләме елына 35 миллион тоннадан артып китә. ТР Рәисе Рөстәм Миңнеханов Мәскәүдә «Энергетика» Илкүләм казанышлар форумының «Россия энергетикасының лидерлыгы һәм тотрыклылыгы» пленар сессиясендә шулай дип белдерде.

28 февральдә 13.30 сәгатьтә «Пенза» Кино һәм концерт залында «Пенза өлкәсе татар милли-мәдәни автономиясе»нең 20 еллыгына багышланган тантаналы чара була. Бу хакта Пенза өлкәсе татар милли-мәдәни автономиясенең «ВКонтакте» социаль челтәрендәге сәхифәсендә хәбәр ителә.

Узган ялларда, 17 февральдә, Краснодар татарлары Муса Җәлилнең тормышы һәм иҗатына багышланган әдәби кичә үткәрде. Бу хакта Бөтендөнья татар конгрессының матбугат хезмәте хәбәр итә.

Бүген иртән Әлмәттә кеше үлеменә китергән фаҗига булган, дип хәбәр итте ТР прокурорының өлкән ярдәмчесе Руслан Галиев.

Әтнә муниципаль районы башлыгы Габделәхәт Хәкимов Әтнә районы Советының социаль-икътисади үсеш нәтиҗәләренең киңәйтелгән утырышындагы чыгышында татар теленнән бердәм дәүләт имтиханын тапшыручыларның артуын әйтте.

20 февральдә Лаеш районының Сокуры авылында махсус хәрби операциядә катнашкан Адель Уркунбаевка яңа йорт ачкычы тапшыру тантанасы булды. Хәрбине ТР Премьер-министры урынбасары Роман Шәйхетдинов һәм Лаеш районы башлыгы Илдус Зарипов әлеге тантаналы вакыйга белән котлады.

Татарстан мөфтияте Россиянең Азия өлеше мөселманнары Диния нәзарәтенә яңартылган «Казан басмасы»н җибәрде. Басма Урал, Себер һәм Ерак Көнчыгыш төбәкләренә курьер хезмәте аша барып ирешәчәк, дип хәбәр итә ТР Диния нәзарәте матбугат хезмәте.

Әтнә муниципаль районы башлыгы Габделәхәт Хәкимов Әтнә районы Советының социаль-икътисади үсеш нәтиҗәләренең киңәйтелгән утырышында чыгыш ясады.

Россия Президенты Владимир Путин Федераль Җыенга 29 февральдә мөрәҗәгать итәчәк. Кремль сайтында шундый мәгълүмат урнаштырылган.

Россия Президенты Владимир Путин РФ Хөкүмәтенә күп балалы әтиләргә социаль ярдәм күрсәтү мәсьәләсен карарга кушты, диелә Кремль сайтында урнаштырылган шул турыдагы күрсәтмәдә. Бу хакта РИА Новости агентлыгы хәбәр итә.

2024 елның 25 февралендә, Изге Рамазан ае алдыннан, Саратовта шәһәрнең «Зейд бин Сабит» Коръән үзәге тарафыннан оештырылган мәдәни-агарту чарасы узачак. Бу хакта Россия Мөфтиләр шурасының матбугат хезмәте хәбәр итә.

Сургут шәһәре татарлары милли-мәдәни автономиясендә татар якшәмбе мәктәбендә укучылар һәм аларның әти-әниләре өчен милли баш киеме – түбәтәй тегү буенча мастер-класс узды. Балалар шул исәптән алда торган бәйрәмнәр уңаеннан әти-әниләренә бүләккә татар стилендә матур рәсемнәр дә ясады. Бу хакта Бөтендөнья татар конгрессының матбугат хезмәте хәбәр итә.

Беренчел базарда иң кыйммәт фатирлар Казанның Яңа Савин районында теркәлгән. 2024 елның беренче кварталында әлеге районда бер квадрат метрның уртача бәясе 274 мең сум тәшкил иткән. Бу хакта «Татар-информ» агентлыгы журналистына, шәһәрнең барлык районнарындагы торак бәяләрен анализлап, «Циан.Аналитики» җитәкчесе Алексей Попов хәбәр итте.

«Казан шәһәре башкарма комитетының «Үз телем» грантлар бәйгесе җиңүчеләре эш нәтиҗәләрен комиссиягә тәкъдим итте.

Чаллы шәһәре мөхтәсибәтенең «Тәүбә» мәчете җәяүле йөгерү ярышлары үткәрде. Әлеге чара Коръән аятьләре укып, Чаллы имам-мөхтәсибе Әлфәс хәзрәт Гайфуллин һәм «Тәүбә» мәчете имам-хатыйбы Әбүбәкер хәзрәт Әбдиев тарафыннан җыелган халыкны сәламләү сүзләре белән ачылды, дип хәбәр итә ТР Диния нәзарәте матбугат хезмәте.

VII Халыкара этноспорт фестивале 2025 елда Россиядә узачак. Мондый карар этноспорт фестивале кысаларында Төркиянең Анталия шәһәрендә кабул ителде, дип хәбәр итә ТАСС РФ Спорт министрлыгының матбугат хезмәтенә сылтама белән.

Серб Республикасы Президенты (Босния һәм Герцеговина энтитеты) Милорад Додик Казанга эш визиты белән 19 февраль кичендә килде, дип ATB телевизион каналына сылтама белән ТАСС яза.

Бүген, 20 февральдә, Татарстанда чагыштырмача салкын, әмма тыныч һава торышы урнашачак. Бу хакта ТР Гидрометүзәге хәбәр итә.

Россия Президенты Владимир Путин РФ хөкүмәтенә шәхси клиникаларның медицина хезмәткәрләренең (әгәр бу учреждениеләр дәүләт гарантияләренең бушлай медицина ярдәме күрсәтү программасында катнаша икән) вакытыннан алда пенсиягә чыгу мәсьәләсен карарга кушты. Бу йөкләмә Кремль сайтында бастырылган, дип яза РИА Новости.

Лениногорск Мәдәният сараенда Гаилә елына багышланган мордва халкы кич утырулары узган. Аны шәһәрнең «Эрзянка» мордва халык ансамбле оештырган. Бу хакта ВКонтакте социаль челтәрендәге Лениногорск шәһәре Мәдәният сараеның сәхифәсендә хәбәр ителә.