Новости за 27.02.2024

Россия Президенты Владимир Путинның Федераль Җыенга юлламасын Казанның «Синема 5» кинотетарларында күрсәтәчәкләр. «Татар-информ»га хәбәр итүләренчә, күрсәтүләр бушлай, ә керү ирекле булачак.

1 март көнне Түбән Новгород өлкәсендәге Сафаҗай мәдәният йортында 14-17 яшьлек татар кызлары арасында II «НижгарCылу-2024» өлкә бәйгесе узачак. Бу хакта Бөтендөнья татар конгрессы матбугат хезмәте хәбәр итә.

2024 елда Татарстанда илкүләм проектларны гамәлгә ашыру 25,5 млрд сумга бәяләнә. Бу хакта республиканың финанс министры урынбасары Гела Герасимова «Татар-информ»да узган матбугат конференциясендә әйтте.

Россия Хөкүмәте башлыгы Михаил Мишустин бензин экспортын тыюны хуплады. Чикләү чаралары 2024 елның 1 мартыннан 31 августына кадәр гамәлдә була. Шулай ук хакимиятләр биржада дизель сату нормативын 16 процентка кадәр арттыру карары кабул итте. Әлеге тыю ЕАЭС илләренә, Монголия, Үзбәкстан, Абхазия һәм Көньяк Осетиягә экспортның килешенгән күләмнәренә кагылмаячак. Бу хакта РБК хәбәр итә.

Хәрби кушаматы «Медведь» булган хәрби Рөстәм Әхмәтшин махсус операция зонасыннан өченче тапкыр Мамадышка кайтты. Ул үзенең чираттагы ялы турында беркемгә дә әйтмәгән, ә юлдан туры хатынының эшенә кергән, шулай итеп хатынына да, 5 яшьлек кызына да сюрприз ясаган.

Махсус хәрби операция башланганнан бирле 53 мең кешелек Зәй районыннан махсус операция зонасына – хәрбиләргә, ДНР һәм ЛНР халкына, госпитальләргә 28 рейс гуманитар йөк (гомуми авырлыгы 400 тонна) җибәрелгән.

Татарстан Республикасы ярдәме белән Лисичанск шәһәрендә бер социаль объектка җылылык бирелде.

Татарстанның Нурлат районы журналистлары махсус операция хәрбиләренә гуманитар ярдәм җыюда актив катнаша, аларның күбесе волонтерлык төркемнәрендә тора. Күптән түгел алар «Яктылык. Җылылык. Җиңү!» акциясен башлап җибәрде. Махсус операция зонасына хәрбиләргә җибәрү өчен 70 газ баллоны сатып алынган.

Россия Президенты Владимир Путин Россия Кораллы Көчләренең Махсус операцияләр көчләре хәрбиләрен һәм ветераннарын һөнәри бәйрәмнәре белән котлады. Аларга гадел, намуслы хезмәтләре, шәхси батырлыклары, антларына һәм бурычларына тугрылык өчен рәхмәт әйтте. Видеомөрәҗәгать Кремль сайтында чыккан.

Уфада Россиянең атказанган рәссамы, Башкортстанның халык рәссамы, график, ассамбляж һәм инсталляция рәссамы Васил Ханнанов озак авырудан соң 68 яшендә вафат булган. Бу хакта Татарстанның Мәдәният министрлыгы хәбәр итә.

Татарстан Республикасы Милли музее һәм Габдулла Тукайның Әдәби музее мәктәп укучыларын «Ядкярләрдә Тукай рухы» Бөтенроссия әдәби бәйгесендә катнашырга чакыра. Бу хакта республиканың Мәдәният министрлыгы сайтында хәбәр ителә.

«Интертат» сайтының «Вконтакте» төркемендә туры эфирда уза торган «Әйтер сүз» рубрикасында 40 еллап журналистика өлкәсендә эшләгән журналист, Татарстанның атказанган мәдәният хезмәткәре Рәшит Минһаҗев элеккеге һәм хәзерге вакытта журналистка булган мөнәсәбәт турында сөйләде.

Татар китабы йортында «Яшьлек моңнары» концерты узды. Татарстан мәдәният министрлыгы белән берлектә, Татарстанның мәдәни ресурс үзәге базасында, «ЯшьЛайн» дип исемләнгән проект үз эшчәнлеген алып бара. Автор һәм алып баручы – Гөлназ Рәшитова. Әлеге концертта проектта катнашкан талантлы яшьләр бер сәхнәдә җыелды.

Татарстанның Азнакай районында туып үскән Роза Гадиева Халыкара матурлык бәйгесендә «Мисс Европа» титулына ия булды. Бу хакта NTR 24 сайты яза.

Казанда көллият һәм югары уку йортлары студентларыннан стажировка узуга гаризалар кабул итү башланды. Анкетаны теләгән һәркем җибәрә ала. Алар арасыннан шәхси вакытларын шәһәр процессларын өйрәнүгә багышларга әзер 30 актив һәм кызыксынган студент сайлап алыначак, дип хәбәр итте эшлекле дүшәмбедә шәһәр Башкарма комитеты аппараты җитәкчесе урынбасары – кадрлар сәясәте идарәсе башлыгы Ирина Бочкова. Бу хакта Казан мэриясе матбугат хезмәте яза.

27 февральдә Сарман районы халкы Татарстанда уза торган автобус марафонында катнашачак. Очрашу Җәлил бистәсенең Мәдәният сараенда узачак.

Татарстан Бөтендөнья яшьләр фестиваленең региональ программасында катнашучы 30 шәһәрнең берсе булды. 13-16 март көннәрендә республикага төрле илләрдән 100 кеше киләчәк, дип хәбәр итә ТР Яшьләр министрлыгы ведомство башлыгы Ринат Садыйковка сылтама белән.

Бүген, 27 февральдә, Татарстанда антициклон аркасында коры һәм тыныч һава торышы сакланачак, температура фоны күтәреләчәк. Бу хакта ТР Гидрометүзәге хәбәр итә.

Кайбыч районы Борындык егетен аны ут эченнән коткарган казах дусты эзләп тапкан. Бу хакта «Кайбыч таңнары» хәбәр итә.

Түбән Камада хәрбинең һәм аның сөйгәненең туе узды. Аларны шәһәр мэры, Түбән Кама муниципаль районы башлыгы Рамил Муллин котлады. Бу хакта http://nkamsk-rt.ru/ хәбәр итә.

Лаешта Советлар Союзы Герое Б.К.Кузнецов исемендәге 2нче мәктәп 40 еллык юбилеен билгеләп үтте. Тантаналы чара Лаеш өчен тарихи вакыйга — мәктәпнең беренче директоры Валентин Ивановка мемориаль такта ачу белән башланды. Бу хакта «Кама ягы» хәбәр итә.

Әлмәттә татар гимназиясе диварында аны тәмамлаган Динар Кадыйров хөрмәтенә мемориаль такта куелды. Хәрби хезмәткәрне 2022 елның көзендә мобилизациялиләр. Бу хакта «Әлмәт таңнары» хәбәр итә.

Спас районы администрациясендә узган традицион дүшәмбе киңәшмәсендә пуля ату ярышларында җиңүчеләрне бүләкләделәр. Ярышлар атна дәвамында барды һәм Ватанны саклаучылар көне һәм махсус хәрби операция башлануы көненә багышланды. Бу хакта «Яңа тормыш» хәбәр итә.