Бишкекте мектептер менен бала бакчалар эки күн онлайн окутууга өтөт
Бишкек шаарында 25-27-октябрь күндөрү Шанхай Кызматташтык Уюмунун (ШКУ), Көз карандысыз мамлекеттер шериктештигинин (КМШ) жана Евразиялык өкмөттөр аралык кеңешинин жыйындары өтөт.
Ошондой эле Кытайдын премьер-министри Ли Цян мамлекеттик сапар менен, ал эми монгол өкмөт башчысы Лувсаннамсрайн Оюун-Эрдэнэ жумушчу сапар менен келет.
Бул иш-чараларга байланыштуу шаардагы мектептер менен бала бакчалар эки күн онлайн окутууга өтөт. Ошондой эле бул күндөрү Бишкектин айрым көчөлөр маал-маалы менен жабылып турат.
Тышкы иштер министрлигинин билдиришинче, Монголиянын премьер-министринин жумушчу сапары 23-октябрда башталып, 25-октябрда аяктайт.
Кытайдын өкмөт башчысы Ли Цяндын мамлекеттик сапары 24-25-октябрь күндөрү болот.
Сапарлардын алкагында кыргыз бийлигинин башчылары менен жолугушуулар өтүп, бир катар документтерге кол коюлат.