Кыйноолорду алдын алуу борбору интернаттагы укук бузууларды аныктады
Кыргызстандын Кыйноолорду алдын алуу борборунун жана Акыйкатчы институтунун кызматкерлери 22-октябрда Ош шаарындагы Д.Султанов атындагы мектеп-интернаттагы балдардын абалы менен таанышты.
Кыйноолорго каршы борбордун маалымдашынча, мектеп-интернатта тарбиялануучулардын укугу бузулган учурлар аныкталган.
Окуучулар менен сүйлөшкөндө кыздардын бири тарбиячы катаал мамиле кылып, колун көгөртө чымчып алганын айтып берген. 9-класстын окуучулары сабак учурунда таштанды чогулуп калган цистернаны тазалашкан.
Окуучулар интернатты жыйнап жаткан учурда биринин далысына бетондун сыныгы түшүп кетип, чоң тырык пайда болгон.
8-9-класстын окуучулары дене тарбия сабагынан кийин душка чайканууга мүмкүнчүлүк жоктугуна даттанышкан. Алардын айтуусунда, балдар жууна турган мончо дем алыш күндөрү гана иштейт, анын да абалы начар
"Башталгыч 1-4-класстын окуучулары үчүн эки унитаз орнотулган бир гана даараткана иштейт. 5-9-класстар үчүн орнотулган дааратканада болгону жалгыз унитаз иштейт. Суу жылыткыч жок", - деп жазылган маалыматта.
Окуучулар 19-октябрда тамактан курт чыкканы үчүн жебей коюшканн айтышкан. Эреже боюнча балдардын тамак-ашы үчүн камдалган азык-түлүк кампада, атайын текчелерге коюлушу керек болгону менен, баары жерде чачылып жатканы аныкталган.
Мектеп-интернаттагы мүчүлүштүктөрдөн улам акт түзүлүп, прокуратурага жана Кара-Суу райондук билим берүү бөлүмүнө жиберилген.
Кыргызстанда 37 балдар интернаты бар. Анын ичинен 16сы Эмгек, социалдык камсыздоо жана миграция министрлигине караса, 21и Билим берүү жана илим министрлигине караштуу. Интернаттарда жалпы 5 миңдей бала тарбияланат.(ZKo)