Новости за 02.01.2024

Яңа ел бәйрәме районда бик күңелле чаралар белән башланып китте. Актанышта җигүле атлар, тройкалар парады булды. Бу хакта «Актаныш» сайтында хәбәр ителә.

Азнакайда «Чатыр-Тау Арена» спорт комплексында 2006-2009, 2010-2013, 2014 елгы һәм аннан кечерәк малайлар һәм 2005 елгы һәм аннан кечерәк кызлар арасында көрәш һәм билбаулы көрәш буенча район турниры үтте. Анда район-шәһәр мәктәпләреннән 107 спортчы бил алышты. Бу хакта «Азнакай» сайтында хәбәр ителә.

Лениногорскида яшәүче Светлана Евдокимованы бала тудыру йортында район башлыгы Рәгать Хөсәенов белән Кыш бабай һәм Кар кызы да өченче бала тууы белән котлады. Бу хакта район башлыгы «ВКонтакте» социаль челтәрендәге сәхифәсендә хәбәр итә.

2 - 8 гыйнвар көннәрендә Түбән Кама паркларында һәм скверларында күңел ачу чаралары узачак. Бу хакта Түбән Кама муниципаль районы рәсми сайтында хәбәр ителә.

2024 елның 1 апреленнән Россиядә машина йөртүче булырга кандидатларга автомобиль белән идарә итү хокукына практик имтихан вакытында күбрәк хата ясарга рөхсәт ителергә мөмкин. Бу хакта ТАСС Россия Эчке эшләр министрлыгы әзерләгән административ регламент проектына сылтама белән хәбәр итә.

2 гыйнварда Омскида «Ихлас» мәчетендә 7 яшьтән 14 яшькә кадәрге мөселман балалары өчен лагерь эшли башлады. Смена 8 гыйнварга кадәр дәвам итәчәк. Бу хакта «Вконтакте» социаль челтәрендәге «Омск татарлары» сәхифәсендә хәбәр ителә.

1 гыйнварда Түбән Новгород өлкәсе мөселманнары Диния нәзарәтенә нигез салучы һәм аның беренче рәисе, Россия мөселман дин әһеле, күпсанлы кешеләрнең укытучысы һәм остазы Гомәр хәзрәт Идрисовка 70 яшь тулган булыр иде. Бу хакта Түбән Новгород өлкәсе татарларының төбәк милли-мәдәни мохтариятенең «Вконтакте» социаль челтәрендәге сәхифәсендә хәбәр ителә.

Россия Президенты Владимир Путин Менделеевскида туган лейтенант Данат Насыйбуллинны бүләкләде. Дәүләт башлыгы хәрбигә Ярыгин пистолеты һәм фрак билгесе - РФ Президенты штандартын тапшырды. Бу турыда «Татар-информ» хәбәр итте.

Татарстан эчке эшләр министрының элеккеге урынбасары Рафил Ногмановны Арча зиратында җирләячәкләр. Ул бүген 74 яшендә вафат булды.

Иртәгә, 3 гыйнварда, Татарстанда кабат һава температурасы төшүе фаразлана. Бу турыда Гидрометеорология һәм әйләнә-тирә мохитне күзәтү үзәге хәбәр итә.

Бүген Казанда татар җәмәгатьчелеге филология фәннәре докторы, Татарстан Республикасы Дәүләт гербының идея авторы Назыйм Ханзафаровны соңгы юлга озатты. Галим 31 декабрь көнне 86 яшендә вафат булды.

2024 елның 1 гыйнварыннан Россиядә торакның гомуми мәйданының 1 квадрат метры бәясе нормативы 97,5 мең сум тәшкил итәчәк. Әлеге ставка беренче ярты елга билгеләнә. Бу турыда РИА Новости.

Татарстан башкаласында 2024 елда беренче бала 1 гыйнварда 5.16 сәгатьтә туган. Ул 2940 грамм авырлыктагы кыз бала. Бу хакта Казан мэриясенең матбугат хезмәте Татарстан Сәламәтлек саклау министрлыгының Казан сәламәтлек саклау идарәсенә сылтама белән хәбәр итә.

Татарстан эчке эшләр министрының элеккеге урынбасары, Татарстан Иҗтимагый палата рәисе урынбасары, полиция генерал-майоры Рафил Ногманов вафат булу сәбәпле, Татарстан Дәүләт Советы Рәисе Фәрит Мөхәммәтшин парламент депутатлары һәм шәхсән үз исеменнән кайгы уртаклашу белдерде.

Татарстан эчке эшләр министрының элеккеге урынбасары Рафил Ногманов белән хушлашу мәрасиме иртәгә, 3 гыйнварда, 08.30 сәгатьтә Казанның Карл Маркс урамында Менжинский мәдәният йортында була.

Ульяновскиның «Өмет» газетасында Рузия Хәлимованың «Татар автономиясе нәтиҗәле эшләү үрнәге күрсәтә» дигән язмасы чыкты.

Түбән Новгород өлкәсенең «Туган як» газетасы редакциясеннән Кыш бабай Камка авылына барып, Венера һәм Рифат Мангушевлар гаиләсен Рәхмәт хаты белән бүләкләде һәм эксклюзив календарьлар тапшырды. Бу хакта «Туган як» газетасының «Вконтакте» социаль челтәрдәге сәхифәсендә хәбәр ителә.

«Татар-информ»га билгеле булганча, бүген Татарстан эчке эшләр министрының элеккеге урынбасары, Законлылык һәм хокук тәртибе комитеты рәисе урынбасары Рафил Ногманов вафат булган.

2024 елның 1 гыйнварыннан Россиядә йөклелек һәм бала табу буенча пособиенең максималь күләме 565 мең сум булды. Хакимият 1,5 яшькә кадәр бала карау буенча түләүләрнең максималь күләмен дә арттырган. Хәзер ул 49 мең сум тәшкил итә. Бу хакта ТАСС яза.

«Новосибирск өлкә татар мәдәни үзәге» дәүләт бюджет мәдәният учреждениесенең «Алтын йолдыз» яшьләр клубы егетләре «Милләтләр дуслыгы» кубогының финал матчында катнашты.

Россия Президентын сайлауда мөмкин булган кандидатлар исемлегенә хәзерге вакытта 11 кеше кергән. Аларның икесе теркәү өчен документлар бирде. Бу хакта Россия Үзәк сайлау комиссиясе рәисе урынбасары Николай Булаев сөйләде. ТАСС шул хакта яза.

Бүген, 2 гыйнварда, Татарстанда шактый салкын, шул ук вакытта болытлы һәм карлы һава торышы көтелә. Бу хакта Гидрометеорология һәм әйләнә-тирә мохитне күзәтү үзәге хәбәр итә.

Интернет челтәрендә Россия Президенты Владимир Путин гражданнарны Яңа 2024 ел белән татар телендә котлаган видео чыкты. Роликны нейрочелтәр генерацияләгән дип фаразлыйлар. Бу турыда kazanfirst.ru басмасы яза.

Яңа ел алдыннан Яшел Үзән шәһәренең Мирный микрорайонында «Кеше приюты» бушлай кайнар ризык тарату ноктасын ачу тантанасы булды. Яшел Үзәндә бу инде икенче пункт, ә Татарстан Республикасында – 18нче. Бу хакта «Яшел Үзән» сайтында хәбәр ителә.

Апаста яшь спортчылар һәм мобилизацияләнгән хәрбиләрнең балалары өчен район башлыгының чыршы бәйрәме узды. Бу турыда «Апастово-информ» хәбәр итә.