Новости за 22.01.2024

Менделеевскида Бөек Ватан сугышында катнашучы Билал Вәлиев вафат булган. Аңа 98 яшь иде.

Татарстан, Россия Федерациясенең барлык субъектлары һәм тулаем ил кебек үк, махсус хәрби операциядә катнашучыларга, аларның гаиләләренә, балаларына ярдәм итүдә актив катнаша. Бу парламентның да, «Бердәм Россия» сәяси партиясенең дә, Татарстанның да өстенлекле эше. Бу хакта «Бердәм Россия» партиясенең Татарстан төбәк бүлеге секретаре, ТР Дәүләт Советы Рәисе Фәрит Мөхәммәтшин белдерде.

Бүген Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыевның Төньяк Кавказ Федераль округына эш сәфәре башланды. Ул Владикавказ шәһәреннән Ингушетия Республикасына килде. Биредә Милли Шура рәисе Хөкүмәт әгъзалары белән очрашуда катнаша.

Мәскәүдә түләүсез татар теле дәресләре башланды. Мәрҗани исемендәге мәгариф үзәгендә беренче дәрескә 48 кеше җыелган иде.

2025 елның 1 сентябреннән 5-7 сыйныфлар өчен Россия тарихы фәне «Безнең төбәк тарихы» модуле белән тулыландырылачак. Россия Мәгариф министрлыгының боерыгы норматив-хокукый актлар проектларының федераль порталында чыкты.

Татарстан Рәисе Рөстәм Миңнеханов бүген Калмыкия башлыгы Бату Хасиков белән төбәкара багланышлар һәм юнәлешләр буенча элемтәләрне үстерү мәсьәләләре турында фикер алышты. Бу хакта Татарстан җитәкчесенең матбугат хезмәте хәбәр итә.

Россия Социаль фонды Татарстанда яшәүчеләргә бирелә торган түләүләрнең күпчелеген 2024 елның гыйнварында индексацияләгән. Бу хакта бүген Россия Социаль фондының Татарстан буенча матбугат хезмәте хәбәр итә.

Россия Федерациясе Федераль Җыены Дәүләт Думасы Рәисе Вячеслав Володин Татарстанның беренче Президенты, ТР Дәүләт Киңәшчесе Минтимер Шәймиевне 87 яшь тулу уңаеннан котлады.

Узган ел Татарстанда алданган өлешчеләр проблемасын ябарга мөмкин булды: 2023 елның декабрендә Казанда проблемалы объектларның бердәм реестрына кертелгән соңгы ике объект файдалануга тапшырылды. Алар - Академик Губкин урамындагы йортларның паркинглары. Бу хакта ведомство коллегиясенең йомгаклау утырышында Татарстан төзелеш, архитектура һәм торак-коммуналь хуҗалык министры Марат Айзатуллин хәбәр итте.

Узган ел Татарстанда меңнән артык кеше ташламалы авыл ипотекасы белән торак сатып алган. Бу максатларга 4 млрд сумлык кредит бирелде. Татарстан Авыл хуҗалыгы һәм азык-төлек министрлыгы матбугат хезмәте шул хакта хәбәр итә.

Казанның Россия Федерациясе Герое майор С.А. Ашихмин исемен йөрткән 130нчы мәктәбендә махсус хәрби операциядә һәлак булучылар истәлегенә почмак барлыкка киләчәк. Бу мәктәпне тәмамлаган ике хәрби махсус операциядә һәлак булган, почмакта алар турында мәгълүмат, шәхси әйберләр урнаштырылачак.

«Казан-Университет» метеостанциясе мәгълүматлары буенча, соңгы өч тәүлектә Казанда айлык нормада явым-төшем яуды. Якынча фаразлар буенча, алдагы декадада шәһәрдә әле кар явуы көтелә. Бу хакта Казан федераль университеты профессоры, география фәннәре докторы Юрий Переведенцев хәбәр итте.

Татарстанда бюджет акчасыннан нәтиҗәле файдалануны тәэмин итәргә һәм төзелешнең барлык этапларында - проект карарларын эшләүдән башлап, эшләрне турыдан-туры кабул итүгә кадәр ришвәтчелек һәм башка төрле законсызлыклар мөмкинлеген юкка чыгарырга кирәк. Бу хакта республика Төзелеш, архитектура һәм торак-коммуналь хуҗалык министрлыгы коллегиясенең йомгаклау утырышында Татарстан Рәисе Рөстәм Миңнеханов хәбәр итте.

Гыйнварның соңгы декадасында Татарстанда һава торышы тотрыксыз булачак. Антициклонга алмашка чираттагы циклон җылы алып килә. Бу хакта Казан федераль университеты профессоры, география фәннәре докторы Юрий Переведенцев хәбәр итте, дип яза «Татар-информ».

Төрекмәнстанның элеккеге Президенты Гурбангулы Бердымөхәммәдов 2021 елда Татарстан Рәисе Рөстәм Миңнехановка бүләк иткән Акдусның уңышларына куануын белдергән. Төрекмән алабае «Урта Азия овчаркасы» номинациясендә Россия кинология федерациясе версиясе буенча Россия чемпионы булды.

Татарстанда инженерлык челтәрләренең торышы зур сораулар тудыра, һәм аларның тузу проблемасы комплекслы чишелешне таләп итә. Бу хакта Татарстан Төзелеш, архитектура һәм торак-коммуналь хуҗалык министрлыгы коллегиясенең йомгаклау утырышында республика Рәисе Рөстәм Миңнеханов хәбәр итте, дип яза «Татар-информ» хәбәрчесе Александр Хевронин.

11 гыйнварда Мордовия Республикасы мөселманнары Үзәк Диния нәзарәте җитәкчелеге эш сәфәре кысаларында Темников шәһәренең мөселман өммәте белән очрашты. Мөфтият вәкилләре Темников мәчетен төзү эшләренең барышы белән танышты. Бу хакта «Ислам мәдәни үзәге» порталы хәбәр итә.

19-20 гыйнварда ТР Мәгариф һәм фән министрлыгының Республика олимпиада үзәгенең «Дуслык» ООК базасында IX-XI сыйныф укучылары арасында көнчыгыш (гарәп һәм төрек) телләреннән республика олимпиадасының йомгаклау этабы узды.

Татарстан Рәисе Рөстәм Миңнеханов Казан дәүләт архитектура-төзелеш университеты (КДАТУ) базасындагы ике яңа фәнни-белем бирү үзәгенең - «Агымнар» һәм «Девелопмент» - эше белән танышты. Республика җитәкчесен КДАТУ ректоры Рәшит Низамов, ТР төзелеш, архитектура һәм ТКХ министры Марат Айзатуллин, ТР мәгариф һәм фән министры Илсур Һадиуллин, Казан мэры Илсур Метшин һәм төзелеш компанияләре вәкилләре озатып йөрде. Бу хакта ТР Рәисенең матбугат хезмәте хәбәр итә.

2024 ел – Россиядә Гаилә елы уңаеннан Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау һәм үстерү мәсьәләләре комиссиясе «Казан утлары» журналы редакциясе белән берлектә каләм ияләре һәм мәктәп укучылары арасында «Оясында ни күрсә...» дигән әдәби бәйге игълан итә.

Лисичанскиның халык күп яши торган ике микрорайонында җылылык белән тәэмин итү системасын эшләтеп җибәрделәр. Шәһәр хезмәтләренең үзара бәйләнеше буенча оператив штаб белән Татарстан Республикасы вице-премьеры Евгений Варакин җитәкчелек итте.

Россия президентлыгына кандидат, гамәлдәге дәүләт башлыгы Владимир Путинның сайлау штабы вәкилләре РФ Үзәк сайлау комиссиясенә сайлаучыларның 2024 елда узачак Россия Президентын сайлауда кандидатны теркәү өчен кирәкле имзаларын китерде. Бу хакта ТАСС агентлыгы хәбәр итә.

Татарстанда азык-төлеккә бәйле вазгыять тотрыклылана, якын арада кирәкле бөтен продукция кибет киштәләрендә урын алачак. Республика Авыл хуҗалыгы һәм азык-төлек министрлыгында шулай дип белдерделәр. Республика кибетләренә беренче чиратта кирәкле азык-төлекне өзлексез китерү оештырылды, дип искәрттеләр ведомствода.

Түбән Новгородның «Туган як» газетасында «Семочки стеласы» дигән язма чыкты.

Татарстан Рәисе Рөстәм Миңнеханов муниципаль район вәкилләренә махсус коммуналь техника ачкычлары тапшырды. Тантана «Казан Экспо» мәйданчыгында ТР Төзелеш, архитектура һәм ТКХ министрлыгының йомгаклау коллегиясе кысаларында узды.