Новости за 11.01.2024

Быел Түбән Камада педагогика көллиятенә капиталь ремонт ясалачак. Бу хакта Түбән Кама муниципаль районы рәсми сайтында хәбәр ителә.

Мәчетле районында зур бәйрәм - «Кышкы сабантуй» үтте. Аны үткәрү урыны Олы Ыктамак авылының үзәк мәйданы булды, дип хәбәр итте Мәчетле районы татарлары автономиясе социаль челтәрдәге сәхифәсендә.

Краснодарда татар халык биюләре дәресләре башлана. Биредә 8-12 яшьлек балалар төркеме җыела. Бу хакта «ВКонтакте» социаль челтәрендә «Краснодар татарлары» сәхифәсендә хәбәр ителә.

Татарстан Премьер-министры урынбасары, Бөтендөнья татар конгрессының Милли шура рәисе Васил Шәйхразыев Башкортстанда эш сәфәрендә. Биредә ул «Заман» татар яшьләр клубы катнашучылары белән очрашты. Бөтендөнья татар конгрессы матбугат хезмәте шул хакта хәбәр итә.

Төмәннең «Яңарыш» газетасында Рәүфә Кангазинаның «Туган тел буенча өлкә олимпиадасы нәтиҗәләре» дигән язмасы чыкты.

РФ Конституцион судының элеккеге рәисе Марат Баглай вафат булу сәбәпле, Россия Президенты Владимир Путин кайгы уртаклашу белдерде. Телеграмма Кремль сайтында чыкты.

Инвестор 2030 елга Татарстанда йомырка җитештерүне елга 1,7 млрд данәгә җиткерергә, шулай ук ашлык җитештерү күләмен арттырырга һәм яңа эш урыннары булдырырга ниятли. Бу хакта Дәүләт Думасы депутаты Максим Топилин Телеграм-каналында язган.

Түбән Новгород өлкәсенең Сергач шәһәре «Лидер» физкультура-савыктыру комплексында Рафаэль Баһаветдинов истәлегенә хоккей традицион турниры узды. Аны хоккейчының гаиләсе һәм якын дуслары Рифат Сәлахетдинов һәм Олег Жиһаншин оештырды. Бу хакта «Туган як» газетасының «ВКонтакте» социаль челтәрендәге сәхифәсендә хәбәр ителә.

Осиновода газ шартлаган йортны сүтәчәкләр. Бу хакта Яшел Үзән районы башлыгы Михаил Афанасьев хәбәр итте, дип яза «Татар-инфор».

Үзәк Банк 12 гыйнварга долларның рәсми курсын 88,7818 сумга кадәр төшерде. Бу элеккеге курстан 61 тиенгә арзан була.

Финляндия хөкүмәте Россия белән чиктә контроль-үткәрү пунктлары ябылу срогын 11 февральгә кадәр озайтты. Бу хакта бүген республика Эчке эшләр министрлыгы башлыгы Мари Рантанен хәбәр итте. РИА Новости шул хакта яза.

Татарстан Премьер-министры Алексей Песошин ТР Архив эше буенча дәүләт комитетының йомгаклау коллегиясендә катнашты. Чара «Казан Экспо»да узды. Утырыш алдыннан ТР Хөкүмәте башлыгы Столбище авылындагы дәүләт архивының яңа бинасында булды. Бу турыда Татарстан Рәисенең матбугат хезмәте хәбәр итте.

Коронавируска каршы «Спутник V» вакцинасын ясаучыларның берсе Борис Народицкий вафат булган. Бу хакта РИА Новости хәбәр итә.

«Манзара» спорт һәм музыка премиясе быел җиденче тапкыр үткәрелә. 20 гыйнвар көнне «Пирамида» мәдәни-күңел ачу комплексында көрәшчеләр белән бергә каратистлар чыгышы да көтелә. Бу хакта «Татар-информ»да узган матбугат конференциясендә сөйләделәр.

Татарстанда бүген Аракчино - Югары Ослан боз кичүе ачылды. Ул тәүлек буе һәм ял көннәрсез эшләячәк. Бу хакта «Казан - Югары Ослан кичүе» берләшмәсендә «ВКонтакте» социаль челтәрендәге сәхифәсендә хәбәр иттеләр.

2024 елның 1 гыйнварыннан Татарстанда минималь хезмәт хакы минималь кулланучылар бюджеты белән тигезләште. Бу Республиканың өч яклы килешүенә имза кую нәтиҗәсендә мөмкин булды.

2024 елның мартына билгеләнгән Россия Президентын сайлауны уздыру чорына дистанцион электрон тавыш бирүнең территориаль сайлау комиссиясе формалаштырылды. Бу хакта Россия Үзәк сайлау комиссиясе Телеграм-каналында хәбәр ителә.

Россия Президенты Владимир Путин nature.kremlin.ru сайтын эшләтеп җибәрү турында игълан итте, анда Россия тыюлыклары эше турында мәгълүмат урнаштырылачак. Аның сүзләренчә, бу кызыксынучы кешеләрне Россия табигате байлыгы белән таныштыруга тагын бер адым.

Татарстанда һава торышы бозылу сәбәпле, федераль юлларда шәһәрара автобуслар, маршрут таксилары һәм йөк машиналары хәрәкәте вакытлыча чикләнде. Чикләүләр 15.00 сәгатьтән һава шартларын яхшырганчыга кадәр кертелә.

Татарстанда Гаилә елы кысаларында чараларны гамәлгә ашыру эшен активлаштырырга кирәк. Бу хакта «Бердәм Россия» партиясенең төбәк бүлекчәсендә узган селектор киңәшмәсендә Татарстанның Дәүләт Советы Рәисе — «Бердәм Россия» Бөтенроссия сәяси партиясенең Татарстан төбәк бүлеге секретаре Фәрит Мөхәммәтшин белдерде.

СССРның халык артисты һәм Кече театрның сәнгать җитәкчесе Юрий Соломин 88 яшендә вафат булды. Бу хакта ТАСС хәбәр итә.

Соңгы елларда Россия башкаласында татар теленә кызыксыну шактый артты. Һәм ул этник татарлар һәм руслар арасында гына түгел, ә башка милләт вәкилләре арасында да бара. Әлеге фикерне Мәскәүнең Төньяк-Көнчыгыш административ округының «Ихсан» ислам дини оешмасы идарәсе башлыгы Ринат хәзрәт Фәсхетдинов белдерде.

2023 ел нәтиҗәләренә караганда, Татарстан Республикасы агросәнәгать комплексы продукциясен экспортлау күләме 450 млн доллар тәшкил итәргә мөмкин. Республиканың Авыл хуҗалыгы һәм азык-төлек министрлыгы башлыгы Марат Җәббаров әлеге саннарны ТАСС белән уртаклашты.

6 гыйнвар көнне Пенза өлкәсенең Кече Труев авылы мәдәният йортында «Татар кызчыгы —2023. Татар малае —2023» бәйгесе узды. Аны белем бирү учреждениеләрендә тәрбияләнүчеләр арасында оештырдылар. Бәйгедә Күзнәй районының Кече Труев, Зур Труев, Татар Кынадысы, Бистән, Махалино авыллары һәм Евлашево бистәсеннән 6-12 яшьлек балалар катнашты. Бу хакта Бөтендөнья татар конгрессы матбугат хезмәте хәбәр итә.

Татарстан Рәисе Рөстәм Миңнеханов БРИКС илләре уеннарын әзерләү һәм үткәрү буенча республика оештыру комитетын төзү турында указны имзалады. Аның рәисе итеп Татарстан Республикасы җитәкчесе үзе билгеләнде.