Новости за 28.01.2024

Алабуганың Морт авылы кешеләре хәрбиләр өчен 200нче маскировка челтәре җитештерү аларны үрүче осталар өчен дә, бөтен авыл халкы өчен дә шатлыклы вакыйга булды. Бу хакта «Алабуга нуры» хәбәр итә.

Лениногорск районы башлыгы Рәгать Хөсәенов Гаилә елы уңаеннан Лениногорскида яшәүче күп балалы гаилә - Виктор Лукьянов һәм Татьяна Хуҗаназарова гаиләсендә булды. Бу хакта «Заман сулышы» Лениногорск шәһәре мэриясенең ВКонтакте социаль челтәрендәге сәхифәсенә сылтама белән хәбәр итә.

Бүген Кукмара районы Аш-Буҗи авылында өч район авылларыннан килгән хоккей командалары ярышы узды. Ярышны авыл яшьләре оештырган, оештыру өчен чыгымнарны авылдагы хәйриячеләр һәм авыл халкы күтәргән.

Актанышның «Без бергә!» концерт төркеме 2024 елда беренче чыгышын район мәдәният сараенда тәкъдим итте. Волонтер-артистларның 2023 елда старт алган хәйрия концертларын районның һәр җирлегендә көтеп алдылар. Тамашаларга сатылган билет акчалары махсус хәрби операциядәгеләргә гуманитар ярдәм алуга тапшырылды. Бу хакта «Актаныш» сайтында хәбәр ителә.

Татарстан Милли музее филиалы – Салих Сәйдәшевнең музее директоры Айдар Әхмәдиев «Татар-информ» хәбәрчесе белән әңгәмәдә ремонттан соң музейдагы яңалыклар турында сөйләде.

Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Екатеринбург шәһәренең Халыклар Дуслыгы скверында урнашкан патриот-шагыйрь Муса Җәлил һәйкәленә чәчәкләр салды.

Татарстан Республикасы Рәисе Рөстәм Миңнеханов үзенең Акдус алабаен йөрергә чыккач төшергән фотосын Telegram-каналында күрсәткән.

Казанның 18нче хастаханәсендәге янгын турында Россия Гадәттән тыш хәлләр министрлыгының Татарстан буенча баш идарәсендә тәфсилләбрәк сөйләделәр.

Бүген Казанның «Ак Барс» һәм Астананың «Барыс» командалары арасындагы хоккей матчында Казан командасы җиңде. Уен исәбе – 3:1. Матч Астанада узды.

26 гыйнварда популяр җырчы, Башкортстан һәм Татарстанның атказанган артисты Вәсилә Фәттахованың бакыйлыкка күчүенә сигез ел тулды. Вәсиләнең ире Илгиз Габдрәкыйпов социаль челтәрләрдә хатынына багышланган пост бастырган һәм аны «Бәхетебез бикле ятмасын» җыры белән бергә урнаштырган. Бу хакта «Башинформ» яза.

Актанышта Әлфия Авзалова исемендәге район мәдәният сараенда быел беренче «Без бергә!» хәрбиләргә ярдәм концерты оештырылды. Тамашачылар арасында махсус операция зонасыннан ялга кайткан хәрбиләр дә бар иде.

Казанның 18 нче хастаханәсе бинасында янгын турында хәбәр бүген 13.24. сәгатьтә кергән. Бу хакта «Татар-информ»га Россия Гадәттән тыш хәлләр министрлыгының Татарстан буенча идарәсе матбугат хезмәтеннән хәбәр иттеләр.

Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыевның Свердловск өлкәсенә эш сәфәре дәвам итә. Бүген ул Екатеринбург шәһәрендәге «Мәгърифәт» ислам үзәге белән танышты.

Бүген социаль челтәрләрдә Казанның Мәүлетов урамындагы бер хастаханә бинасы өстендә төтен күтәрелү кадрлары таралган.

Россиядә ана капиталы һәм башка социаль түләүләр индексацияләнә, әлеге закон 1 февральдән үз көченә керә. Бу хакта Дәүләт Думасы спикеры Вячеслав Володин Дәүләт Думасы Telegram-каналында сөйләгән, дип яза РИА Новости.

Татарстанның Свердловск өлкәсендәге даими вәкиллеге бинасының төзекләндерү эшләреннән соң тантаналы ачылышы узды. Бинаны төзекләндерүгә Татарстан Республикасы ярдәм итте, дип яза Бөтендөнья татар конгрессы матбугат хезмәте.

«Мисс Татарстан 2024» титулын Чаллыдан Эвелина Габитова алды. 26 нчы республика матурлык бәйгесенең финалы кичә Казанда, «Пирамида» мәдәни-күңел ачу комплексында узды.

Гамәлдәге законнарга кертелгән төзәтмәләр нигезендә Россиядә пенсионерлар һәм пенсиягә чыгар яше җитүчеләр берничә салым ташламасы алачак дип фаразлана. Бу хакта Югары икътисад мәктәбе илкүләм тикшеренү университетының хокук факультеты деканы Вадим Виноградов сөйләде, дип яза «Труд».

Көнгә өч чынаяк чәй картлыкны әкренәйтергә ярдәм итә. Әлеге фикерне Кытай галимнәре тикшеренүләренә сылтама белән эндокринолог, медицина фәннәре докторы Зөһрә Павлова белдерә. Бу хакта «Труд» газетасы яза.

Казанда Татарстан Фәннәр академиясенең Сул як Болак урамындагы 36а бинасына ремонт ясалачак. Ремонт эшләре 17 млн сумнан артык булыр дип бәяләнә. Ул дәүләт сатып алулары порталында урнаштырылган тендерда бирелгән.

Мәҗбүри пенсия иминиятенә кертем түләүче үзмәшгуль россиялеләрне эшләмәүче пенсионерларга тиңләргә мөмкиннәр. Нәтиҗәдә, аларга да пенсия индексацияләнәчәк. Бу хакта «Прайм» агентлыгына биргән интервьюда Россиянең атказанган юристы Иван Соловьев сөйләде, дип яза РИА Новости.

2024 елның 15-22 гыйнвар аралыгында Татарстанда бензинның барлык марка бәяләре үзгәрешсез калган, ә дизель ягулыгы арзанайган. Бу хакта Татарстан Республикасы буенча дәүләт статистикасы федераль хезмәтенең территориаль органы (Татарстанстат) мәгълүматлары раслый.

Татарстанда гараж амнистиясе нәтиҗәсендә 12,7 меңнән артык күчемсез милек объекты рәсмиләштерелгән. Шуларның 6,5 меңнән артыгы 2023 елда теркәлгән, алар арасында — 2316 гараж һәм 4245 җир участогы. Бу хакта Татарстан Республикасы буенча дәүләт теркәве, кадастр һәм картография федераль хезмәте хәбәр итә.

15-21 гыйнвар атнасында Татарстанда тавык йомыркасы 0,94 процентка арзанайган. Дистәсенең бәясе 130,01 сумнан 128,77 сумга кадәр төшкән. Шул ук вакытта республикада яшелчәләргә бәя арту дәвам итә. Әйтик, кыярның килограммы 10 сумга диярлек кыйбатланган — 236,53 сумга, яки 4,47 процентка. Бу хакта Татарстан Республикасы буенча федераль дәүләт статистикасы хезмәтенең территориаль органы (Татарстанстат) хәбәр итә.

Якшәмбе, 28 гыйнварда, Татарстанда аязучан болытлы һава көтелә, бераз кар булырга мөмкин. Бу хакта республиканың Гидрометеорология үзәге хәбәр итә.