Новости за 12.01.2024

Бүген Кайбыч районы ЗАГСында ике балага туу турында таныклык тапшыру тантанасы узды. Күптән түгел бәби алып кайткан гаиләләрнең шатлыгын уртаклашырга район башлыгы Альберт Рәхмәтуллин һәм башкарма комитет җитәкчесенең социаль мәсьәләләр буенча урынбасары Фәния Петухова да килде. Бу хакта «Кайбыч таңнары» хәбәр итә.

Казан телеманарасында 13 һәм 14 гыйнварда бәйрәм уты кабыначак. Якты иллюминацияне Иске Яңа ел хөрмәтенә трансляцияләячәкләр.

Россиядә бензинга бәяләр үсеше елның беренче тугыз көнендә инфляция дәрәҗәсеннән югарырак булып чыкты — 0,45 процентка каршы 0,26 процент. Бу хакта дәүләт статистикасы федераль хезмәте (Росстат) мәгълүматлары сөйли.

Россия спорт министры Олег Матыцин Татарстанның илдә спорт тармагы үсешенә керткән өлешен югары бәяләде. Түрә республиканы федераль министрлыкның ышанычлы партнеры дип атады һәм төбәк җитәкчелегенә актив катнашулары өчен рәхмәт белдерде.

Фигуралы шуу буенча танылган совет һәм Россия тренеры Татьяна Тарасова фигуралы шуу остасы Алинә Заһитованы «Миллиард.Татар» сайтының тавыш бирүендә яулаган «Ел татар кызы» исеме белән котлады. Интернет-басма редакциясендә хәбәр итүләренчә, рейтингта спортчыга Казанда төзеләчәк фигуралы шуу мәктәбе проекты җиңү китергән.

Саратов өлкәсе мөселманнары төркеме Россия төбәкләреннән башка дин кардәшләре белән бергә кышкы каникул көннәрендә гомрә – кече хаҗ кылу өчен Мәккә һәм Мәдинәгә барган. Төркемне Саратов өлкәсе мөфтие урынбасары Ильяс хаҗи Богатырев җитәкләгән. Бу хакта Россия мөселманнары шурасы матбугат хезмәте хәбәр итә.

Татарстан Дәүләт Советы Рәисе Фәрит Мөхәммәтшин яңа срокка тәкъдим ителүдән баш тарткан очракта мөмкин булган варисның исемен әйтмәде. Бу сорауны матбугат конференциясендә журналистлар биргән иде.

Гамәлдәге дәүләт башлыгы Владимир Путинның Россия Президенты вазифасына үз-үзен тәкъдим итүен хуплап, 1,8 млн имза җыелган. Бу хакта кандидатның putin2024.ru сайтында хәбәр ителә.

Бүген Казанның «Ак Барс» хоккейчылары «Трактор» командасына 1:3 исәбенә оттырды. Матч Чиләбедә узды.

Киләсе дүшәмбе, 15 гыйнварда, Татарстанда «Татарстан – казанышлар республикасы» автобус марафоны старт ала. Автобус 1 мартка кадәр хәрәкәт итәчәк һәм республиканың 29 районында булачак. Марафон барышында спикерлар халыкка район, республика, ил казанышлары турында сөйләячәк.

Казанда «Киләчәк уеннары» мультиспорт турнирының спорт программасы һәм үткәрү объектлары расланды. Карар Россия вице-премьеры Дмитрий Чернышенко рәислегендәге оештыру комитеты утырышында кабул ителде.

Иртәгә, 13 гыйнварда, Татарстан территориясендә температура фонының кабат сизелерлек төшүе көтелә. Бу хакта Татарстан Гидрометеорология үзәге хәбәр итә.

Казанда 21 февральдән 3 мартка кадәр тарихта беренче «Киләчәк уеннары» узачак. Анда 100 дән артык илдән 2 меңгә якын кеше катнашачак. Ярышлар 21 дисциплинада оештырыла. Бу хакта Россия Тышкы эшләр министрлыгының рәсми вәкиле Мария Захарова брифингта сөйләде.

Татарстан Рәисе Рөстәм Миңнеханов Россия спорт министры Олег Матыцин белән очрашты. Сүз, нигездә, Казанда узачак «Киләчәк уеннары»н оештыруга әзерлек турында булды. Бу хакта Татарстан җитәкчесе матбугат хезмәте хәбәр итә.

Түбән Новгород татар яшьләре һәм Түбән Новгород өлкәсе татар автономиясе яшь активистлары Яңа ел бәйрәм ялларын бергәләп, актив үткәргән. Бу хакта Түбән Новгород өлкәсе татар милли-мәдәни автономиясе «ВКонтакте» социаль челтәрендәге сәхифәсендә хәбәр итә.

Татарстан Республикасының хокукый мәгълүмат рәсми порталында Лаеш районы Олы Кабан һәм Кече Кабан җирлекләрендә күпкатлы төзелешне тыю турында карар чыкты. Бу хакта «Татар-информ»га Кече Кабан авылында яшәүче Роман Третьяков хәбәр итте.

2027 елда яңа интернет-портал эшләтеп җибәрү планлаштырыла. Анда һәр татарстанлы ясалма интеллект ярдәмендә үзенең шәҗәрәсен төзи алачак. Бу хакта «Татар-информ»га Татарстан Архив эше буенча дәүләт комитеты рәисе Гөлнара Габдрахманова хәбәр итте.

Фигуралы шуу остасы Алинә Заһитова «Миллиард.Татар» сайты оештырган конкурсның ике дипломы фотосурәтен үзенең Telegram-каналында урнаштырган.

Казанда мэр премиясен гамәлгә куйдылар, аны гомуми белем бирү фәннәреннән халыкара олимпиадаларда җиңүчеләргә һәм аларның педагогларына тапшырачаклар. Карар электрон Документлар һәм хокукый актлар җыентыгының яңа чыгарылышында басылды.

Волгоград шәһәренең Кызыл Армия районында балалар өчен татарча «Яңа ел» бәйрәме узды. Волгоградның Кызыл Армия районы татарлары милли-мәдәни мохтарияте чарасын рәис Рафаэль Самитов оештырды. Бу хакта Бөтендөнья татар конгрессы матбугат хезмәте хәбәр итә.

Татарстанда Дәүләт Советы депутатларын сайлау вакытында сайлау системасын үзгәртергә планлаштырмыйлар. Хәзер партия исемлекләре буенча 50 депутат һәм бер мандатлы сайлау округлары буенча 50 депутат сайлана. Бу хакта матбугат конференциясендә ТР Дәүләт Советы Рәисе Фәрит Мөхәммәтшин сөйләде.

Татарстан Хезмәт, халыкны эш белән тәэмин итү һәм социаль яклау министрлыгы өчен 2024 елга өстенлекле бурычларның берсе - ташламалы ипотеканы озайту. Бу хакта ведомство коллегиясенең йомгаклау утырышында аның җитәкчесе Эльмира Зарипова белдерде. Бу турыда «Татар-информ» хәбәрчесе Александра Давыдова яза.

Татарстан Дәүләт Советы Рәисе Фәрит Мөхәммәтшин парламент җитәкчесе вазифасына тәкъдим ителү турында карарны әлегә кабул итмәгәнен белдерде. Бу хакта ул бүген журналистларга матбугат конференциясендә хәбәр итте. Бу турыда «Татар-информ» хәбәрчесе Надежда Гордеева яза.

2024-2025 елларда Россия югары уку йортларында түләүле нигездә уку 10-12 процентка кыйммәтрәк булырга мөмкин. Бу хакта «Известия» газетасына Россия Дәүләтнеке булмаган югары уку йортлары ассоциациясе президенты Владимир Зернов сөйләгән.

13 декабрьдән бирле беренче тапкыр сәүдә вакытында евро курсы 97 сумнан төште. Бу хакта Мәскәү биржасы белешмәсеннән күренә.