Новости за 10.01.2024

«Авыл укытучысы» программасын гамәлгә ашыру 2030 елга кадәр озайтылачак. Бу хакта Россия Президенты Владимир Путин Анадырь шәһәрендә яшәүчеләр белән очрашуда белдерде (трансляция Кремльнең матбугат хезмәте Telegram-каналында оештырылды).

Россиядә күп бала табу модага керә. РФ Президенты Владимир Путин Анадырьда яшәүчеләр белән очрашуда, ирле-хатынлы Верещагиннарның күп балалы гаиләләрне бердәнбер торакка салымнан азат итү турындагы мәсьәләне карау тәкъдимен шәрехләп, шундый тенденция күзәтелүе турында әйтте.

«Ярдәм» мәчете имамы Рафис хәзрәт Гайфуллин Коръәннең татар теленә тәрҗемәсен – тәфсирен Луи Брайль шрифтында бастырып чыгарырга ниятләүләрен әйтте.

Хөкүмәт Ерак Көнчыгышта күп балалы гаиләләргә ташламалы автокредит бирү мәсьәләсен өйрәнәчәк, дип белдерде РФ Президенты Владимир Путин Анадырьда яшәүчеләр белән очрашуда. Бу хакта РИА Новости агентлыгы хәбәр итә.

Татарстанда үзе укый торган Кукмара мәктәбенә һөҗүм әзерләүдә шикләнелгән 15 яшьлек укучыны тоткарладылар.

«Ярдәм» гомуммилли хәйрия фонды президенты Илһам Исмәгыйлев фондның узган елдагы эшләренә йомгак ясады һәм быел Рамазан аенда ифтар үткәрү турында сөйләде.

Россиялеләр ана капиталы акчасын шул исәптән бакчачылык җәмгыятендә йорт сатып алу өчен дә сарыф итә алачак. Әмма биредә истә тотылырга тиешле кайбер нечкәлекләр дә бар. Дәүләт Думасы депутаты, Мәскәү өлкәсе Бакчачылар берлеге рәисе Никита Чаплин «Российская газета»га биргән интервьюсында гаиләгә ана капиталын йорт сатып алу һәм ремонтлауда файдаланырга мөмкинлек бирсеннәр өчен дачаның нинди критерийларга җавап бирергә тиешлеге турында сөйләде.

Тинчурин театры базасында яшь режиссерлар өчен белем бирү курслары башлана. Дәресләрне баш режиссер Туфан Имаметдинов алып барачак. Бу хакта Тинчурин театры матбугат хезмәте хәбәр итә.

2024 ел башындагы кебек салкыннар инде чирек гасыр күзәтелмәгән иде. Алдагы көннәрдә көтелгән җылылык кыска вакытлы булачак, дип белдерде КФУ медиапорталына Экология һәм табигатьтән файдалану институтының метеорология, климатология һәм атмосфера экологиясе кафедрасы доценты Тимур Әүһәдиев.

Мурманск шәһәре ислам үзәгендә балалар арасында ислам дине нигезләре буенча өлкә бәйгесе узды. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.

«Ярдәм» гомуммилли хәйрия фонды журналистлар өчен Әлмирә Әдиятуллина премиясен тапшырачак. Бу хакта «Татар-информ» агентлыгында узган матбугат очрашуында хәбәр ителде.

Чаллының баш санитар табибы Илгизәр Бариев киләсе атнадан ОРВИ, грипп һәм коронавирус белән авыручыларның артуы көтелә, дип белдерде.

Казан үзәгендәге яктылык конструкцияләренең эше 2024 елның мартына кадәр озайтылырга мөмкин. ТР башкаласы мэриясенең телеграм-каналында, халыкның сорауларына җавап биреп, шулай дип искәрттеләр.

Чаллы мэры Наил Мәһдиев «Кече Ватан – Россиянең көче» Бөтенроссия муниципаль форумына әзерлек һәм аны үткәрү буенча оештыру комитеты әгъзасы итеп билгеләнде. Чара беренче тапкыр 15-17 гыйнварда Мәскәүнең Халык хуҗалыгы казанышлары күргәзмәсендә (ВДНХ) Бөтенроссия җирле үзидарәне үстерү ассоциациясе ярдәмендә узачак. Шәһәр җитәкчесе аппарат киңәшмәсе вакытында шулай дип белдерде.

Пхукеттан ерак булмаган Хе утравы янында Россиянең алты туристы утырган яхта баткан. Бу хакта РИА Новости агентлыгы хәбәр итә.

«Википедия»нең Россия тиңдәше – «Рувики» - 15 гыйнварда бета-тестлаштырудан чыга. 2024 ел дәвамында платформа технологик яңартулар белән тулы версиядә эшли башларга тиеш. Бу хакта ТАСС агентлыгы хәбәр итә.

2024 елда Россиядә илкүләм проектларны гамәлгә ашыруга 3 триллион сумнан артык акча каралган, дип хәбәр итә ТАСС агентлыгы федераль Финанс министрлыгына сылтама белән.

Россия Президенты Владимир Путин эш сәфәре белән Чукоткага килде, бу – илнең әлеге төбәгенә аның беренче визиты. Бу хакта ТАСС агентлыгы хәбәр итә.

Рамазан ае җитәргә төгәл 2 ай кала – раҗәб һәм шәгъбан айлары дәвамында Казан мәчетләрендә халыкны Коръән укырга өйрәтәчәкләр. Дәресләр Татарстан мөфтияте һәм КИУның Госман ибне Гаффан исемендәге Коръән хафизлар әзерләү үзәге тарафыннан әзерләнгән махсус программа нигезендә оештырыла. Бу хакта ТР Диния нәзарәте хәбәр итә.

Кичә 50 нче яшендә Радик Хәлилов вафат булды, дип хәбәр итә ТР прокурорының өлкән ярдәмчесе Руслан Галиев. Хәлилов 25 ел гомерен прокуратура органнарында хезмәт итүгә багышлый. ТР прокуратурасының аеруча мөһим эшләрне тикшерүне күзәтү бүлеге тикшерүчесе һәм өлкән прокуроры вазифаларын башкара.

10 гыйнварда Татарстанда аязучан болытлы һава көтелә. Бу хакта республиканың Гидрометеоүзәге хәбәр итә.

Казанның сәүдә үзәкләренең берсендә яңа ел чыршыларын эшкәртү өчен кабул итәчәкләр. Акция 13-31 гыйнварда узачак.

19 гыйнварда 10 сәгатьтә Алабуга дәүләт музей-ядкарьлегенең Заманча этносәнгать музеенда «Чаян» журналының баш мөхәррире Рафаэль Хәлилулловның сәнгать сөючеләр клубы әгъзалары белән очрашуы була. Ул легендар журналның 100 еллык юбилеена һәм «Чаян» карикатурачылары күргәзмәсен ачуга багышлана. Бу хакта «Алабуга нуры» хәбәр итә.

Кукмараның Кәркәүч мәдәният йортында рәссам Мөнип Фатыйховның «Тормыш бизәкләре» дип исемләнгән шәхси күргәзмәсе оештырылды. Бу хакта «Хезмәт даны» сайты Әлфия Газизуллинага сылтама белән хәбәр итте.

Әлки районы башлыгы Александр Никошин танк батальоны командиры, подполковник Дамир Ганиев белән очрашты. Бу хакта «Әлки хәбәрләре» яза.