Новости за 27.01.2024

13-27 гыйнварда Мәскәүдә Яңа Третьяковкада «Хезмәт сәнгате» күргәзмәсе уза. Анда Кама Тамагы комбайнчысы Шамил Нуруллинның портреты Яңа Третьяковка күргәзмәсенә куелган. Биредә 200 дән артык иң яхшы рәсем сәнгате, графика, скульптура әсәрләре, шулай ук 2023 елда «Вакыт, алга!» фестивале кысаларында Россия рәссамнары тарафыннан эшләнгән инсталляцияләр тәкъдим ителгән. Бу хакта «Идел таңнары» хәбәр итә.

Зәйнең Урта Баграж мәдәният йортында махсус хәрби операция зонасына җибәрү өчен маскировкалау челтәрләре үрәләр. Хатын-кызлар эшне ике сменада оештырган, көнгә бер маскировка челтәре үреп бетерәләр. Челтәр үрергә Сарсаз-Баграждан да төшүчеләр бар. Уллары махсус хәрби операциядә катнашучыларның әниләре дә тартылды бу эшкә. Бу турыда «Зәй яңалыклары»нда хәбәр ителә.

Әтнә районында яшәүче ир дүртенче баласын өендә үзе таптырган. Әлеге герой атаның кем булуы белән кызыксынып шалтыратучылар да булды. Бу турыда «Әтнә таңы» яза.

Республика кан үзәгендә волонтер-медиклар һәм Казан федераль университеты студентлары белән берлектә «Студент көне» донорлык акциясе узды. Бу хакта Татарстан Сәламәтлек саклау министрлыгы матбугат хезмәте хәбәр итә.

«Урал» башкорт милли-мәдәни автономиясе һәм Түбән Кама химия-технология институты милли мөнәсәбәтләр өлкәсендә иң яхшы практикларның VI Бөтенроссия бәйгесендә җиңүче булды. Аларның «ЭтноSTYLE – это наш стиль!» социаль проекты җиңү яулады. Бу хакта Түбән Кама муниципаль районы рәсми сайтында хәбәр ителә.